«Кепилдик фонд» ААК өз ишмердүүлүгүн баштагандан бери 2.6 миң ишкерге кепилдик берген
«Кепилдик фонд» ААК өз ишмердүүлүгүн баштагандан бери жана 2022-жылдын 4-июлуна карата күрөө менен кыйынчылыктарга дуушар болгон ишкерлерге 2655 кепилдик берген. Бул тууралуу аталган фонддун маалымат кызматы билдирди.
Фонддун берген маалыматына ылайык, кепилдиктердин суммасы 4 млрд сомдон ашкан, анын ичинен дээрлик 2.7 млрд сому региондордо чакан жана орто бизнести өнүктүрүүгө багытталган, бул берилген кепилдиктердин жалпы көлөмүнүн 67%ын түзөт.
“Кепилдиктер өнөктөш-банктарга ишкерлерге 14 млрд сомдон ашык насыя берүүгө мүмкүндүк берди. Аймактардагы бизнес тарабынан 9.1 миллиарддан ашык кредиттик ресурстар алынган. Артыкчылыкта берилген кепилдиктердин 84%ы өлкөнүн аймактарына жөнөтүлгөн”, – деп айтылат билдирүүдө.
Ошондой эле кепилдиктердин 50%дан ашыгы айыл чарбасын өнүктүрүүгө жана айыл чарба продукциясын кайра иштетүүгө берилген жана ал тиешелүүлүгүнө жараша 46% жана 5%ды түзгөн.
Фонддун максаты – чакан жана орто ишкердиктин субъекттеринин насыя жана башка финансылык ресурстарына болгон жеткиликтүүлүгүн камсыз кылуу, чакан жана орто ишкердиктин субъекттеринин насыя келишимдерине, финансылык ижара (лизинг) келишимдерине жана банк гарантиясын берүү туурасында келишимдерге негизделген милдеттенмелери боюнча гарантия системасын өнүктүрүү.
Улуттук банк фондду 2019-2020-жылдары туруктуу капиталдаштыргандын эсебинен анын уставдык капиталы 4.132 млрд сомго чейин көбөйгөн.
