Япониялык компания инвестиция салуу боюнча Борбор Азия өлкөлөрүн изилдеп жатат. «Улуу Көчмөндөр Мурасы» менен да таанышты
4-июлда «Улуу Көчмөндөр Мурасы» Улуттук холдинг компаниясынын президенти Теңиз Бөлтүрүк менен япониялык Advanced Material Japan Corporation компаниясынын атайын кеңешчиси Шигео Накамура менен жолугушту. Бул тууралуу мекеменин маалымат кызматы билдирди.
Шигео Накамуранын айтымында, учурда Япония инвестиция салуу жана түрдүү тармактарда бизнес долбоорлорун түзүү үчүн Борбор Азия өлкөлөрүн изилдеп жатат.
Япониялык компаниянын өкүлүнө «Кумтөр Голд Компани» ЖАКтын башкаруучусу болгон «Улуу Көчмөндөр Мурасы» Улуттук холдинг компаниясынын долбоорлору тууралуу кеңири маалымат берилди.
Аталган япониялык компаниянын ишмердүүлүгүнө жакын болуп саналган сейрек жер элементтер кенин иштетүү долбоору Шигео Накамуранын өзгөчө кызыгуусун жараткан. Япониялыктар сейрек кездешүүчү элементтерди жеткирүүнү диверсификациялоого кызыкдар экендигин, ал эми Кутессай-II долбоору өз кезегинде Борбор Азия чөлкөмүндөгү мындай объектилердин арасынан өндүрүшкө алуу баскычына жакын экенин белгилешкен.
«Биз алдыңкы технологияларды алууга, инвестицияларды тартууга кызыктарбыз жана биздин мамлекеттерибиз үчүн өз ара пайдалуу кызматташууга даярбыз», – деп белгиледи «Улуу Көчмөндөр Мурасы» Улуттук холдинг компаниясынын президенти.
Advanced Material Japan Corporation (AMJ) — Япониядагы алдыңкы соода компаниясы жана дистрибьютору. Компания сейрек кездешүүчү металлдарга, вольфрам концентратына, оксиддерге жана вольфрам буюмдарынын дагы башка түрлөрү боюнча адистешкен. AMJ ошондой эле молибден, титан, тантал, ниобий, ферросплав жана башка сейрек кездешүүчү металлдар рынокторунда күчтүү позицияга ээ.
Компания өндүрүштө чоң тажрыйбага ээ, анын тарыхы Chori Advanced Material Ltd компаниясынан баштап, 2004-жылы негизделген AMJ компаниясы менен уланат. Компаниянын башкы кеңсеси Токиодо жайгашкан, Пекинде, Шанхайда, Москвада, Владивостокто, Торонтодо, Ханойдо жана Улан-Батордо өкүлчүлүктөрү бар.
