«Кумтөрдөн» 262 млрд сом өндүрүүгө доо арыз жазган жаран желим иштетүүчү завод курду - акчаны «Кумтөр» берген

Жети-Өгүз районунун Саруу айылында “Кумтөрдүн” колдоосу
менен желим калдыктарды кайра иштетүүчү завод ишке кирди. Бул тууралуу мекеменин маалымат кызматы билдирди.

Маалыматта Кумтөр кенинде чогултулган жана сорттолгон бардык желим калдыктары ушул заводдо кайра иштетилери жана андан жемиш кутучаларын чыгарууну пландап жатышканы айтылат. Ишкана үчүн заманбап жабдуулар Беларуста чыгарылган жана аны сатып алууга жана Кыргызстанга жеткирүүгө каражатты “КГК” өзү берген.

Заводдун аталышы тууралуу маалымат жок.

Бирок белгилей кетчү нерсе, маалыматта – ишкананын жетекчиси Айбек Сарыбаев экени айтылган.

Айбек Сарыбаев деген ким?

 «Кумтөр» маселеси Айбек Сарыбаев, Нарис Калчаев, Аблас Жээнбеков жана Кемелбек Кутмановдун «Кумтөр Голд Компани» ишканасынын үстүнөн жазган арызынын негизинде башталган. Активисттер ишкананын Кумтөр кенин иштетүүдө Давыдов, Лысый мөңгүлөрүнө калдыктарды топтогонун мыйзамсыз деп таанып, мамлекеттин пайдасына кенемте өндүрүп берүүнү суранышкан.  

Бишкек шаарынын Октябрь райондук соту 7-майда төрт адамдын «Кумтөр Голд Компани» (Centerra Gold Inc. алтын өндүрүүчү компаниясынын туунду компаниясы ) ЖАКна болгондоо арызын канааттандырган. Ага ылайык, «Кумтөр» кенин иштетүүдө Давыдов жана Лысый мөңгүлөрүнө келтирилген зыяндар үчүн 261.7 млрд  сом, андан сырткары 1.3 млрд сом улуттук салык (пошлина) мамлекетке төлөп берүүгө милдеттендирилген.  

Берилген маалыматтарга таянсак, Сарыбаев менен бийликтин ортосунда жең ичинен макулдашуулар болгону байкалат.

Быйыл эле Бишкек шаардык соту “Кумтөр Голд Компанинин” миллиарддаган айып пулу боюнча чечимин жокко чыгарган. Президент Садыр Жапаров айып пулдун жоюлушуна жарым-жартылай комментарий берип, ал 4-июлдан кийин бул соттук териштирүү боюнча толук маалымат берүүгө убада берген эле.