Америкалык DevX окуу жайы кыргызстандык жети ЖОЖ менен IT адистерин даярдоо боюнча келишим түздү
Америкалык DevX окуу жайы кыргызстандык жети жогорку окуу жайлары (ЖОЖ) менен биргеликте дүйнө жүзү боюнча эң көп талап кылынган IT тармагындагы адистерди даярдашат. Бул тууралуу КРнын АКШдагы элчилиги билдирди.
“12-июлда Бишкекте IT тармагында адистерди даярдаган америкалык DevX аттуу окуу жайы менен КРнын сегиз ЖОЖдорунун ортосунда дүйнө жүзү боюнча эң көп талап кылынган IT адистерин биргелешип даярдоо боюнча келишим түзүлдү”, – деп айтылат маалыматта.
Мындай иш-чарага КРнын АКШдагы жана Канададагы элчиси Бакыт Аманбаев, Илим жана билим берүү министри Алмаз Бейшеналиев, АКШнын Кыргызстандагы элчисинин милдетин аткаруучу Соната Коултер, КРнын сегиз мамлекеттик университетинин ректорлору жана америкалык DevX мектебинин негиздөөчүлөрү катышышкан.
Окутуу англис тилинде өткөрүлөт жана окуу мөөнөтү сегиз айга созулат. Окутуу онлайн түрүндө өткөрүлүп, дүйнөлүк ири компанияларда иштеген тажрыйбалуу адистер лекция окушат. Бүтүрүүчүлөрдүн 99%ы жогорку маянадагы жумуш табууга жетишкендигин өзгөчө баса белгилөөгө болот.
Окутуу системасы жана окутуу толугу менен америкалык DevX компаниясы тарабынан уюштурулат. Ал эми кыргызстандык окуу жайлар болсо студенттерге алардын окуусу үчүн толук шарттарды түзүү жана зарыл болгон окуу жабдууларын даярдап беришет.
Аталган программага Кыргызстандан КГТУ, ОшГУ, ИГУ, ЖАГУ, НГУ, ТалГУ, БатГУ окуу жайлары катышышат.
Америкалык DevX окуу жайы соңку бир нече жылдан бери АКШнын аймагында IT тармагындагы эң зарыл болгон онго жакын кесип ээлерин ийгиликтүү даярдап келет.
