Кыргызстанда Stat.salyk.kg ачык маалымат порталы ишке кирди
Мамлекеттик салык кызматы салыктык башкаруу боюнча Stat.salyk.kg ачык статистикалык маалымат порталын ишке киргизди.
МСКдан маалымдашкандай, Stat.salyk.kg жарандарга салыктык башкаруудагы актуалдуу маалыматтарды бир жерден алууга мүмкүнчүлүк берет, анда учурдагы мезгил үчүн маалыматтар мурунку жылдарга салыштырмалуу жарыяланган.
“Бул коомчулукка Салык кызматынын ишине мониторинг жүргүзүү жана контролдоо мүмкүнчүлүгүн берет”, – дейт Салык кызматы.
Stat.salyk.kg порталы төмөнкүлөрдү камтыйт:
- Салык кызматы канча салык жана камсыздандыруу төгүмдөрүн алды, анын ичинде киреше салыгын, сатуудан алынуучу салыкты, КНСти (ички жана ЕАЭБ импортуна) чогулткандыгы тууралуу маалыматтар
- Иштеп жаткан юридикалык жактар, жеке ишкерлер, ири салык төлөөчүлөр жөнүндө маалымат да ачык жана жеткиликтүү
- Өлкөдө канча ККМ орнотулгандыгын билүүгө болот.
Мекемеден билдиришкендей, порталдагы маалымат ар ай сайын жаңыланып турат. Ошондой эле Салык кызматы кардарларга багыт алууга, маалыматтык ачыктыкка жана тейлөө мүмкүнчүлүктөрүн модернизациялоого карата багыт алганын белгилейт.
МСК ачыктык принцибин ишке ашыруу менен салык төлөөчүлөргө жеке маалыматтардын сакталышына кепилдик берерин билдирди.
