МИК: Алты жылда 7 миң үй-бүлө турак-жайлуу болду
Мамлекеттик Ипотекалык Компанияга(МИК) 7 жыл болду. «МИК» АКК 2015-жылы июлда Өкмөттүн буйругу менен негизделген. Биринчи ипотекалык насыялар 2016-жылдын март айынан берилип баштаган.
МИКтин берген маалыматына таянсак, андан бери 7 100 үй-бүлө турак-жайлуу болушкан жана бул үчүн компания 10 млрд сомдон ашык акча каражат жумшаган.
- 2016-жылы ишке кирген биринчи турак-жай программасынын алкагында 5 200 жаран үйлүү болгон.
- Ал эми 2021-жылы ишке кирген «Менин үйүм 2021-2026» турак жай программасынын алкагында 9 айда 4.5 млрд сомго 1 700дөн ашуун үй-бүлө турак-жайлуу болушкан.
МИК ай сайын компаниянын ишмердүүлүгүнүн артында 190-200 үй-бүлө турак жайлуу болуп жатканын билдирди.
“Натыйжада, бюджеттик тармактарда иштеген кызматкерлер эле эмес, баардык жарандарга ипотекалык насыя алуу мүмкүнчүлүгү пайда болду. МИК Кыргызстандын бардык аймактарында Мамлекеттик курулуш агенттиги жана курулуш компаниялардын катышуусунда көп кабаттуу үйлөрдүн курулушун баштайт. Бул өнөктүк өлкөдөгү турак-жайга болгон суроо талаптын акырындап этап этабы менен камсыздап, анын жеткиликтүүлүгүн жогорулатат”, – дейт мекеме.
Компания 2 жыл мурда Кыргызстанда онлайн форматта иш алып барууга өтүп, заявкаларды электрондук түрдө гана кабыл ала баштаган. МИК жалпы Кыргызстан боюнча ипотекалык насыяларды партнер-банктардын жардамы менен берип келет.
Ошондой эле маалыматта МИК Кыргызстандыктарды жеткиликтүү турак жай менен камсыз кылуу үчүн учурда чоң долбоолордун үстүндө иштеп жатканы айтылат.
