Новопокровкада «ЭлДан Аталык» чарбасынын 10 га эгин аянты күйүп кетти
Новопокровка айылында кечээ, 19-июлда ачык айдоо аянтынан өрт чыгып, анын кесепетинен «ЭлДан Аталык» агроөнөр жай комплексинин 10 гектар эгин аянты күйүп кетти. Бул тууралуу Economist.kg басылмасына Өзгөчө кырдаалдар министрлигинин басма сөз кызматы билдирди.
Окуя болгон жерге өрт өчүрүү кызматы барып, саат 18:53тө өрт толугу менен өчүрүлгөн.
Белгилей кетсек, “ЭлДан Аталык” Кыргызстандагы эң ири агроөнөр жай холдингдердин бири “Аталык Групп” тобуна кирет.
«Аталык Групптун» сайтында маалымдалгандай, «ЭлДан Аталык» агроөнөр жай комплекси үрөнчүлүк жана асыл тукум мал чарбасы менен алектенет. Айдоо аянттары 3000 гектардан ашык. Негизги багыттары үрөндүк арпа, беде, кант кызылчасы жана тоют өсүмдүктөрүн өстүрүү болуп саналат.
