Борбор Азия мамлекеттеринин башчылары беш документке кол коюшту
Садыр Жапаров, Касым-Жомарт Токаев жана Шавкат Мирзиёев XXI кылымда Борбор Азияны өнүктүрүү үчүн достук, коңшулук жана кызматташтык жөнүндө келишимге кол коюшту. Документ Чолпон-Ата шаарында өткөн региондун мамлекет башчыларынын төртүнчү консультативдик жолугушуусунун жыйынтыгында кабыл алынганын президенттин маалымат кызматы билдирди.
«Тажикстандын президенти Эмомали Рахмон менен Түркмөнстандын президенти Сердар Бердымухамедов өз өлкөлөрүндө ички процедуралар аяктагандан кийин бул документке кол коюшат», – деп билдирди басма сөз кызматы.
Мамлекет башчылары ошондой эле көп тараптуу форматтардын алкагында Борбордук Азия мамлекеттеринин өз ара аракеттешүү концепциясын, Борбордук Азия үчүн аймактык жашыл күн тартибин жана 2022-2024-жылдарга карата Аймактык кызматташтыкты өнүктүрүү боюнча жол картасын бекитүүнү чечишти.
Мындан тышкары, Борбор Азия өлкөлөрүнүн президенттери Аралды сактап калуу боюнча эл аралык фонддун президенти Эмомали Рахмондун ыйгарым укуктарын узартуу чечимине кол коюшту.
Белгилей кетсек, регион жетекчилеринин жолугушуусунун жыйынтыгында документтердин олуттуу пакетине кол коюу күтүлгөн эле.
