Оштогу абакта самын өндүрүүчү цех иштеп жатат - жарым жылда 9 миң кг чыгарган
Оштогу №42 жатак абагындагы жаңы ачылган цехте алты айда 9 миң кг кир самын чыгарылган жана ал мекеменин керектөөсүн толук жабат. Бул тууралуу «Т-Медиа» порталы билдирди.
Жаза аткаруу кызматынын маалымат катчысы Элеонора Сабатарова аталган порталга билдиргендей, жатак абакта кир самын чыгаруучу цех быйыл январда ишке кирген. Андагы өндүрүлгөн самындар мекеменин өз керектөөлөрүнө иштетилүүдө.
«Өндүрүлгөн товар өзүбүздүн ЦИЗОго, Жалал-Абаддагы бөлүмдөргө таратылды. Биз буга чейин самынды башка керектөөлөрүбүздөй эле тендер жарыялап сатып алчубуз. Азыр ага бөлүнгөн акчаны жумуш орун кылып, цехте иштегендерге айлык акы катары берип жатабыз», — деген Сабатарова.
Учурда цехте 4-5 адамга жумуш орун түзүлүп, туруктуу маяна төлөнүп турат. Мекеме ал жерди чакан ишканага айлантып, өзүнүн керектөөлөрүнөн арткан товарды сатыкка чыгаруу мүмкүнчүлүгүн кароону пландоодо.
