Кыргызстан Өзбекстанга транспорттук-логистикалык жактан тыгыз кызматташууну сунуштады
22-июлда КРнын Өзбекстандагы элчиси Муса Джаманбаев Өзбекстандын
транспорт министри Илхом Махкамов менен жолугушуп, анын жүрүшүндө
эки мамлекет ортосундагы транспорттук-логистикалык
кызматташууну кеңейтүүнүн актуалдуу маселелерин талкуулады. Бул тууралуу элчиликтин маалымат кызматы билдирди.
Тараптар «Кытай – Кыргызстан – Өзбекстан» темир жолун куруу долбоорун
ишке ашыруунун жүрүшү жана бул жаатта кызматташууну мындан ары
өнүктүрүү боюнча биргелешкен аракеттерди жигерлентүү зарылдыгы
тууралуу пикир алмашышкан.
“Мындан тышкары, «Үч-Коргон – Дароот-Коргон» автожолунун курулушу,
үчүнчү өлкөлөргө эл аралык жүк ташуу үчүн кошумча уруксат бланктарын
алмашуу, жайкы туристтик сезонго «Ташкент – Каракол – Ташкент» эл аралык
автобус каттамын ачуу, «Ташкент – Балыкчы» маршруту боюнча темир жол
жана «Ташкент – Тамчы – Ташкент» чартердик авиакаттамдарын, ошондой эле «Ош – Андижан», «Кызыл-Кыя – Фергана» багыты боюнча туруктуу автобус
каттамдарын жандандырууну ишке ашыруу маселелери талкууланды”, – деп айтылат билдирүүдө.
Элчи Джаманбаев ошондой эле «Ош – Ташкент – Ош» багыты боюнча
аба каттамдарын ачуу жана «Самарканд – Тамчы – Самарканд» багыттары
боюнча жаңы каттамдарды уюштуруу мүмкүнчүлүгүн карап чыгууну
сунуштады.
