Минкаб ID-карталардын, айдоочулук жана башка күбөлүктөрдүн санариптик түрүнө укуктук статус берүүнү көздөөдө
Санариптик өнүктүрүү министрлиги санариптик документтерге укуктук статус берүүнү сунуштоодо. Бул тууралуу минкабдын маалымат кызматы билдирди.
Минкаб “КРнын аймагында санариптик документтерди колдонууну киргизүү максатында КРнын өкмөтүнүн айрым чечимдерине өзгөртүүлөрдү киргизүү жөнүндө” токтом долбоорун иштеп чыкты.
Азыркы учурда талап боюнча көрсөтүү үчүн ID-картанын, айдоочулук күбөлүктүн жана транспорт каражатын каттоо күбөлүгүнүн түп нускасынын болбошу мыйзамды бузуу болуп саналат.
“Санариптик трансформация, электрондук башкарууга өтүү мезгилинде санариптик документтерди колдонуу альтернатива катары гана болбостон, алардын туруктуу аналогдоруна салыштырмалуу үстөмдүк кылышы керек. Бул багытта түзүлгөн кырдаалды өзгөртүү мыйзам деңгээлинде өзгөртүүлөр киргизилгенден кийин гана мүмкүн болот.
Ошондуктан, долбоор аталган документтерге укуктук статус берүүнү жана аларды туруктуу түрдөгү түп нускалары менен теңдештирүүнү сунуш кылат”, – деп айтылат токтомдун негиздемесинде.
Минкаб бул долбоор кабыл алынган учурда оң социалдык натыйжа күтүлөт, ал Кыргызстандын жарандарына смартфондо туруктуу түрдөгү түп нускалары менен теңдештирилген санариптик паспортту колдонууга, тиешелүү органдардын кызматкерлерине санариптик айдоочулук күбөлүктү жана транспорт каражатын каттоо жөнүндө күбөлүктү көрсөтүүгө мүмкүндүк берет деп ишендирүүдө.
