Бишкектин аярлуу катмардагы үй бүлөлөрүн жакырчылыктан чыгаруу үчүн 35 млн сом бөлүндү
Бишкек шаарынын жакыр үй бүлөлөрүн жакырчылыктан чыгаруу үчүн 35 млн сом бөлүндү. Бул тууралуу Эмгек, социалдык камсыздоо жана миграция министри Кудайберген Базарбаев Бишкек шаарынын мэри Эмилбек Абдыкадыров менен жолугушуу учурунда билдирди.
“Үй бүлөгө көмөк” жөлөкпулун алган жакыр үй-бүлөлөрдү жакырчылыктан чыгаруу максатында Эмгек министрлиги бүткүл өлкө боюнча “Социалдык контракт” долбоорун ишке ашырат.
“Өкмөттүн токтомуна ылайык, “Социалдык контракт” ишке ашырууга республикалык бюджеттен бөлүнгөн 282 млн сомдон Бишкекке 35 млн сом бөлүндү, бул каражат жакыр үй-бүлөлөрдү жакырчылыктан чыгарууга көмөктөшө турган 350 бизнес долбоорду ишке киргизүүгө жумшалышы керек”, – деди министр.
Өз кезегинде Эмилбек Абдыкадыров райондук Эмгек, социалдык камсыздоо жана миграция башкармалыктары “Социалдык контракт” долбооруна катышуу боюнча жөлөк пул алуучулар үчүн консультацияларды өткөрүп жаткандыгын белгиледи.
Белгилей кетсек, «Социалдык контракт» долбоорунун алкагында пилоттук режимде Кадамжай районунда, Баткен облусунда (50) жана Нарын облусунун Жумгал районунда (50) социалдык жактан аялуу категориясына кирген 100 үй-бүлөгө 100 миң сом өлчөмүндө гранттык каражаттар акысыз берилген.
2022-жылдын февраль айынан баштап долбоордун катышуучулары киреше алып келүүчү бизнес-пландарды ийгиликтүү ишке ашырышкан.
