«Манас» аэропортун тышкы башкарууга алууга Германия менен Түштүк Корея кызыкдар экенин билдиришти
“Манас” аэропортун тышкы башкарууга алууга Германия менен Түштүк Корея кызыкдар экенин билдиришти. Бул тууралуу “Азаттыкка” Инвестициялар боюнча улуттук агенттиктин директору Равшан Сабиров билдирди.
Сабировдун айтымында, учурда ачык сынак өткөрүүгө даярдык жүрүп жатат. Ага Германия, Түштүк Корея сыяктуу бир нече өлкөлөрдөн компаниялар кызыкдар экенин билдирип, сунуштарын беришкен.
“Биз өкмөткө сунуштарды киргиздик. Эки этап менен ачык-айкын конкурсту өткөрөбүз. Бул боюнча президент менен сүйлөштүм. Ал киши ачык-айкын конкурс өткөрүп, татыктуу компания утсун деген тапшырма койду”, – деген Сабиров.
“Манас” аэропортун сырткы башкарууга берүү боюнча ачык сынакты сентябрда өткөрүү пландалууда.
Economist.kg мурда кабарлагандай, министрлер кабинети Түркиянын YDA Group компаниясы менен «Манас» жана «Ош» аэропортторун модернизациялоо долбоорун ишке ашыруу боюнча сүйлөшүүлөрдү жүргүзүп жаткан. Өнөктөштүктүн шарттарына ылайык, эки жылдын ичинде YDA Group 450 млн доллардан 1 млрд долларга чейин инвестиция салып, эки аэропортту толук реконструкциялоону ишке ашырышы керек болчу.
Бирок кийинчерээк минкаб Кыргызстан «Манас» жана «Ош» аэропортторун инвесторлорго тышкы башкарууга берүүдөн баш тартканын билдирген.
