«Комтранском» ЖЧК таштандыларды чыгаруу боюнча өз ишин мыкты аткарган эмес - 78 миң сом айып салынды
Муниципалдык инспекция “Комтранскомго” 78 миң сом айып салды. Бул тууралуу Бишкек мэриясынын маалымат кызматы билдирди.
Октябрь районун тейлеген «Комтранском» ЖЧКсына “Бузуулар жөнүндө” Кодексинин 114-беренесине ылайык, 78 миң сом айып салынды.
Текшерүү учурунда инспекторлор тарабынан таштандыга толгон 6 таштанды аянтчасы аныкталган. Бул фактылардын негизинде жогоруда аталган ишканага карата протоколдор түзүлдү.
Ишкананын жетекчилиги мыйзам бузууну четке кагып жаткандыктан, акыркы чечим чыгаруу үчүн иш административдик комиссияга өткөрүлүп берилген.
Economist.kg мурда маалымдагандай, Октябрь райондук администрациясы менен «Комтранском» ЖЧКсынын ортосунда соттук териштирүүлөр жүрүп жаткан.
Соттук териштирүүгө «Комтранском» ишканасынын көптөгөн мыйзам бузуулары жана катуу тиричилик таштандыларын чыгаруу графиги бузулганы себеп болгон.
Эске салсак, 2016-жылы «Тазалык» ишканасы тарабынан жарыяланган пилоттук долбоордун алкагында Октябрь районунан катуу таштандыларды чыгаруу жеке компанияга өткөн. Пилоттук долбоордун жеңүүчүсү деп «Комтранском» ЖЧКсы таанылган.
Мындан тышкары, учурда Бишкек мэриясы катуу калдыктарды чыгаруу системасын эффективдүү башкаруу үчүн бул кызматтарды эки райондо – Биринчи май жана Свердлов райондорунда аутсорсингге өткөрүү мүмкүнчүлүгүн карап жатат.
