Ош шаарын таза суу менен камсыз кылуу долбооруна тендер жарыяланды - АӨБ 250 млн сом бөлгөн

Ош шаарынын элин таза суу менен камсыздоо долбоорун ишке ашыруу үчүн жалпы суммасы 250 млн сомдук объектилерди курууга тендер жарыяланды. Бул тууралуу Ош шаардык мэриясынын маалымат кызматы билдирди.

Кечээ, 9-августта Ош шаарынын мэри Алмаз Мамбетов “Ош шаарын суу менен камсыздоону жакшыртуу” программасынын алкагында Ош шаарынын суу алуучу курулмасын жана суу тосмосуна суу түтүгүн курууга тендер жарыяланганын билдирди.

Бул долбоордун негизги максаты – нөшөрлөп жааган жамгыр жана суу ташкын мезгилинде калаа тургундарын үзгүлтүксүз таза суу менен камсыз кылуу.

“Бул жерде иш 2 этапка бөлүнгөнүн белгилей кетүү керек. Тендерде баарынан да курулуш компаниялардын техникалык базасынын күчтүүлүгүнө жана тажрыйбасына көңүл бурушат. Экинчи этап – иштин баасы. Катышуучуларды калыс жана объективдүү тандоого тыкыр көзөмөл болот”, – деди мэр.

Белгилей кетсек, Ош шаарынын тургундары ичүүчү сууну Ак-Буура дарыясынан алгандыктан, суу жамгырдан кийин булганса сааттап, айрым учурда эки-үч күнгө чейин шаар эли таза суусуз калат.

Бул долбоордун алкагында диаметри 1000 мм болгон 2.4 км суу линиясын тартуу пландалууда жана ага Азия өнүктүрүү банкы (АӨБ) тарабынан 250 млн сом каралган. Курулуш мөөнөтү 2 жыл. Аталган долбоор боюнча иш 2016-жылы башталган. Долбоор ишке ашкандан кийин нөшөрлөп жааган жамгыр жана суу ташкын мезгилинде жарандарды ичүүчү таза суу менен камсыздоо маселеси 70-80%га чечилээри күтүлүүдө.

Буга чейин Ош мэри Мамбетов тендер июль айында жарыяланарын билдирген болчу.

Эскерте кетсек, 19-майда Ош шаарынын активисттери ар жааган жамгырдан улам токтоп калган таза суунун жоктугуна нааразы болуп, акцияга чыгышкан.