Акылбек Жапаров Кара-Балта спирт заводуна ата мекендик арак чыгаруучу жаңы линия орнотууну тапшырды
Минкаб башчысы Акылбек Жапаров Чүй облусунун Жайыл районундагы Кара-Балта спирт заводуна ата мекендик арак чыгаруучу жаңы линияны орнотуу боюнча өнөктөштөр менен тез арада сүйлөшө баштоону тапшырды. Бул тууралуу бүгүн, 22-августта, минкабдын басма сөз кызматы билдирди.
Маалым болгондой, минкаб башчысы заводго барган иш сапарында “люкс” классындагы продукциянын сапатынан эч ким кынтык таппай турган кылып, ишкананын лабораториясын эл аралык стандарттагы заманбап жабдыктар менен жабдууну тапшырды. Ал ошондой эле заводдун продукциясын чет өлкөгө экспорттоо маселелерин талкуулады.
Жапаров ошондой эле ишкананын бардык аймагына асфальт төшөө, алкоголдук ичимдиктерди сактоочу жайларды оңдоо, дозалоо системасын жаңылоо, башкаруу системасын компьютерлештирүү сыяктуу тапшырмаларды берди.
Мындан тышкары, тиешелүү мамлекеттик органдарга жана жетекчилерге завод кызматкерлеринин эмгек акысын көтөрүү, уникалдуу адистердин айлыгын атайын коэффициент менен эсептөө мүмкүнчүлүгүн карап чыгуу тапшырылды.
