«Үмүт жана Ко» компаниясынын ээлеринин бири Абдуллаевдин кеңсесинен ар кандай валютада 822 млн сом табылды
Улуттук коопсуздук боюнча мамлекеттик комитеттин (УКМК) кызматкерлери тарабынан кармалган «Үмүт жана Ко» ЖЧКсынын ээлеринин бири Журат Абдуллаевден ар кандай валютадагы 822 млн сомго барабар акча алынды. Бул тууралуу бүгүн, 22-августта, аталган комитеттин басма сөз кызматы билдирди.
Мекеменин маалыматына ылайык, тергөө-оперативдик иш-чаралардын жүрүшүндө Абдуллаевдин «Үмүт жана Ко» ишканасындагы кеңсесинен ар кандай калибрдеги ок-дарылар, 2.03 грамм өсүмдүк тектүү баңгизат жана ошондой эле ири өлчөмдөгү акча сакталган жашыруун жай табылган.
Жашыруун жайда төмөндөгүдөй акчалар табылган:
7 354 475 доллар
209 164 100 сом
100 960 евро
1 055 900 рубль
155 дирхам
Алынган каражаттардын жалпы суммасы 822 млн сомго барабар.
