Жапаров менен Ташиев Кумтөргө барып, «КГК» компаниясынын жаңы президенти Алмаз Барыктабасовду тааныштырышты
Минкаб жетекчиси Акылбек Жапаров жана анын орун басары Камчыбек Ташиев Кумтөр кенине иш сапары менен барып, «Кумтөр Голд Компанинин» жаңы президенти Алмаз Барыктабасовду тааныштырышты, деп билдирди минкабдын басма сөз кызматы.
Жапаров кенге барган иш сапарынын алкагында кеңешме өткөрүп, алтын өндүрүүчү ишкананын жетекчилигине «Кумтөр Голд Компани» ЖАКтын жаңы дайындалган президенти Алмаз Барыктабасовду тааныштырды. Ал ошондой эле компаниянын башкармалыгынын төрагасы болуп Болотбек Идирисов дайындалганын билдирди.
“Кумтөр Кыргызстандын эли үчүн иштеши керек. Биз ишкананын жетекчилеринен эффективдүү жана сарамжалдуу башкарууну талап кылабыз. Жерде бир күкүм нан да жатпашы керек. Кумтөр элдин байлыгы жана ал элге гана пайда алып келиши керек.
Иш-чараларга көзөмөл катуу болот. Коррупциянын эч кандай түрү болбошу керек. Карьер бир секундга да ишин токтотпошу керек. Эч кандай каталар болбошу керек. Иш пландарыңызды дүйшөмбүгө чейин министрлер кабинетине тапшырыңыз. Ошону менен бирге 17.5 тонна алтын казып алуу боюнча белгиленген планды аткаруу зарыл», – деди Жапаров.
Минкаб башчысы ошондой эле компаниянын жаңы жетекчилигине жана кызматкерлерине ийгиликтерди жана жемиштүү иш каалады, деп кошумчалады минкабдын басма сөз кызматы.
