«Мамлекеттик ипотекалык компания» аймактардын тургундары үчүн «Жеңилдетилген ипотека» багыты боюнча өзүнчө кезек ачты
Кыргызстандын аймактарын өнүктүрүү үчүн «Мамлекеттик ипотекалык компания» ААКсы (МИК) аймактардын тургундары үчүн «Жеңилдетилген ипотека» багыты боюнча ипотекалык кредиттерди берүү үчүн квота киргизип, аларга өзүнчө кезек ачты. Бул тууралуу компаниянын басма сөз кызматы билдирди.
Компания “Жеңилдетилген ипотека” (Льготная ипотека) багыты боюнча жалпы тизменин тартибин сактоо менен, “Менин үйүм 2021-2026” программасынын аймактардагы катышуучулары эми өзүнчө кезекке тургузулгандыгын билдирди.
Банктарда каржылоо үчүн электрондук кезекке коюлган турак жай Программасынын аймактык катышуучулары аталган тизме менен компаниянын сайтына кирип, таанышса болот.
“ӨЛКӨНҮН АЙМАКТАРЫНДА “ЖЕҢИЛДЕТИЛГЕН ИПОТЕКА” багыты боюнча тизмеге өткөрүлгөн турак жай Программасынын катышуучуларына жакын арада “Сизге турак жай издөө жана Банкка документтерди тапшыруу үчүн 20 күн убакыт берилди” деген СМС-кабар келет“, – деп билдирди МИК.
