Улуттук банк лицензиясыз валюта алмаштыргандарга айып пул салууну улантууда
Улуттук банк лицензиясы жок нак чет өлкө валютасы менен алмашуу операцияларын жүргүзгөндөргө айып пул салууну улантууда.
Регулятордун маалымат кызматы, дагы бир КРнын жаранына (Б.у.Ж) 17 500 сом өлчөмүндө айып пул салганын билдирди.
Мындан тышкары, КРнын мыйзам талаптарын жана Улуттук банктын ченемдик укуктук актыларынын талаптарын бузууга жол бергендиги үчүн бир алмашуу бюросуна 55 миң сом өлчөмүндө айып пул салды.
Белгилей кетсек, Улуттук банк акыркы айларда жөнгө салуучу органдын тиешелүү лицензиясы жок чет элдик валютаны алмаштырган ондогон адамдарды кармап, аларга айып пул салды.
1990-жылдары Кыргызстан эгемендүүлүктү алгандан кийин өлкөнүн финансы системасы жаңы калыптанып келе жаткан мезгилде, дал ушундай чет элдик валютаны алмаштыруу жайларында же банктарда эмес, “кара базарда” жеке адамдардын колунан алмаштыруу көрүнүштөрү кеңири жайылган эле.
