Транспорт министрлиги Бишкек – Ош жолундагы тоннелдерден өтүүчү унаалардан акы алуу тууралуу мыйзам долбоорун чакыртып алды
Транспорт министрлиги Бишкек – Ош жолундагы тоннелдерден өтүүчү унаалардан акы алуу тууралуу мыйзам долбоорун кайра чакыртып алгандыгын расмий сайтында билдирди.
Министрлик жарандардан жана мамлекеттик органдардан түшкөн сунуштарга байланыштуу, төлөмдөрдүн өлчөмүн андан ары тактоо максатында мыйзам долбоорун кайрадан чакыртып алган.
Эскерте кетсек, бул демилге аталган жолдун тоннелдерин талаптагыдай тейлөө жана эксплуатациялоо максатында сунушталган болчу.
Ведомство унааларды алты категорияга бөлүүнү сунуштап жана алардын ар бири үчүн төлөнүүчү акынын өлчөмүн да аныктаган:
- жеңил унаалар, микроавтобустар, джиптер – 50 сом, чет өлкөлүк номурлуу унаалар үчүн 5 доллар
- жүк көтөрүмдүүлүгү 3 тоннага чейинки микроавтобустар жана жүк ташуучу унаалар – 100 сом, чет өлкөлүк номурлуу автоунаалар үчүн 10 доллар
- 22 орунга чейинки автобустар жана жүк көтөрүмдүүлүгү 3 тоннага чейинки жүк ташуучу унаалар – 150 сом, чет өлкөлүк номурлуу жеңил унаалар үчүн 20 доллар
- 22ден 32 орунга чейинки автобустар жана жүк көтөрүмдүүлүгү 10 тоннага чейинки жүк ташуучу унаалар – 300 сом, чет өлкөлүк номурлуу жеңил унаалар үчүн 40 доллар
- 32ден ашык орундуу автобустар жана жүк көтөрүмдүүлүгү 25 тоннага чейинки жүк ташуучу унаалар – 350 сом, чет өлкөлүк номурлуу жеңил унаалар үчүн 60 доллар
- жүк көтөрүмдүүлүгү 25 тоннадан ашкан жүк ташуучу унаалар – 400 сом, чет өлкөлүк номурлуу автоунаалар үчүн 80 доллар.
Унаалардын өтүүсүнө акча чогултуу Бишкек – Ош унаа жолундагы “Сосновка” жана “Кара-Көл” посттору аркылуу жүргүзүлмөк жана бул үчүн атайын мамлекеттик орган аныкталмак.
