Бир грамм алтын кереги жок - президент бир тууган агасынын алтын куймаларын кармап түшкөн сүрөтүнө ачыктама берди
Президент Садыр Жапаров кечээ, 8-сентябрда “Кабар” мамлекеттик агенттигине маек куруп, анда бир тууганы Сабыр Жапаровдун түркиялык компанияда алтын куймаларын кармап түшкөн сүрөтү боюнча суроого жооп берди.
Эскерте кетсек, буга чейин социалдык түйүндөрдө президенттин чет элдик жаран менен кошо алтын куймасын кармап түшкөн бир тууганынын сүрөтү кызуу талкуу жараткан эле.
Президенттин басма сөз катчысы Эрбол Султанбаев Фейсбукта бул сүрөт 2016-2017-жылдары тартылганын айтып, азыркы иштерге тиешеси жок экенин билдирген. Бирок Жапаров бул сүрөт тууралуу өз пикирин билдирди.
Президенттин айтымында, өткөн жылы Лондондогу Баалуу металлдар базарынын ассоциациясы Кыргызстанда өндүрүлгөн алтынды дүйнөлүк биржада сатууга чектөө койгон. Ошол кезде түрк ишкерлери алтын сатып алуу боюнча президенттин агасы Сабыр Жапаровго кайрылган.
“Ал эми сүрөт боюнча, мен тактадым. Түркияда түшкөн сүрөт экен. Эсиңиздерде болсо, былтыр эл аралык алтын сатууну уюштурган Лондондогу Баалуу металлдар базарынын ассоциациясы (LBMA) Кыргызстандын алтынын дүйнөлүк биржада сатуусуна чек коюп койгон.
Ошол мезгилде түрк туугандар мага жана мамлекеттик чиновниктердин кабылдамасына кире алышпай, агама чыгышкан экен.
“Биз сатып алалы. Бизге келип, алтын эриткен цехибизди көрүп кеткиле. Биздин алтын сатып алууга толук мүмкүнчүлүгүбүз бар”, – деп кайрылышыптыр.
Ошол жерге барып, алтын кармап сүрөткө түшкөн экен. Эми муну трагедия кылыштын кереги жок го дейм. Ансыз деле аларга же башка жеке булактарга бир грамм да алтын сатылган эмес. Түрк туугандардан башка он чакты мамлекеттерден жогорудагыдай сунуштар түшкөн”, – деди президент.
Ошол эле кезде Жапаров алтын сатып алуу сунуштары эмне үчүн жеке өзүнө же бийлик өкүлдөрүнө түшүшү керектигин түшүндүргөн жок.
Президент ошондой эле мөөнөтү бүткөндөн кийин жер карабай, “башты бийик көтөрүп жүргөндөй” болуп кетерин кошумчалады.
