Сауд Арабия Камбар-Ата-1 ГЭСин кошо курууга даяр
Сауд Арабия Кыргызстандын экономикасына инвестиция салууга даяр. Бул тууралуу ТИМдин маалымат кызматы билдирди.
Маалыматка таянсак, КРнын Тышкы иштер министри Жээнбек Кулубаев Сауд Араб Падышалыгына болгон иш сапарынын алкагында Сауд Арабиянын Инвестициялар министри Халид Аль-Фалих менен жолугушуп, соода-экономикалык жана инвестициялык кызматташтыкты өнүктүрүүнүн келечегин талкуулаган.
Кулубаев эки тараптуу кызматташуунун жогорку жана прогрессивдүү динамикасын белгилесе, министр Аль-Фалих Сауд Арабия Кыргызстандын экономикасына инвестиция салууга кызыкдар экендигин билдирип, ушуга байланыштуу конкреттүү инвестициялык сунуштарды кароого жиберүүнү өтүнгөн.
“Ошондой эле Сауд Арабиянын Инвестиция министри Камбар-Ата-1 ГЭСинин техникалык-экономикалык негиздемесин иштеп чыгууга жана курулушуна катышууга даяр экенин билдирди.
Министр Аль-Фалих энергетика жана энергиянын кайра жаралуучу булактары, айыл чарба, туризм, логистика, инфраструктураны өнүктүрүү сыяктуу тармактардагы мүмкүнчүлүктөрдү изилдөө үчүн, ушул жылдын сентябрь айында Кыргызстанга жумушчу топ жиберерин билдирди”, – деп айтылат маалыматта.
Ошондой эле Кулубаев маектешин Кыргызстанга келип кетүүгө чакырган. Министр Аль-Фалих аталган чакыруу үчүн ыраазычылыгын билдирип, келечектеги конкреттүү соода-экономикалык долбоорлордун пайдубалын даярдоого тийиш болгон Сауд Арабиянын жумушчу тобунун иш сапарынан кийин Кыргызстанга келерине убада кылган.
Кошумча окуңуз:
Казакстандын президенти “Камбар-Ата-1” ГЭСин биргелешип курууну колдоду
Казакстан менен Өзбекстан «Камбар-Ата-1» ГЭСинин курулушуна инвестиция салууга даяр
Кыргызстан Камбар-Ата ГЭС-1ди Өзбекстан менен чогуу курушу мүмкүн
Кыргызстан инвесторлорду Камбар-Ата жана башка ГЭСтерди курууга катышууга чакырууда
Кыргызстан Камбар-Ата ГЭС-1ди курууга еврооблигациялар аркылуу 500 млн евро алууну көздөөдө
Казакстандын өкмөтү Камбар-Ата ГЭС-1ди чогуу куруу маселесин карап жатат
