Бекешев: мамлекеттик сатып алууларды ачык кылуу керек, ишканалар товарларын кандай баада алып жатышканынан жарандардын кабары жок
Депутат Дастан Бекешев өзүнүн Фейсбук баракчасында учурда аэропорт, темир жол, “Мегаком” сыяктуу ири ишканалар керектөө товарларын кандай баада алып жатышканынан жарандардын кабары жок экенин жана мамлекетке миллиарддаган суммада зыян келтирилип жатканы тууралуу пикирин айтты.
“Ушунчалык кейиштүү. Кумтөр эмнени сатып алып жатканын эч ким билбеши үчүн, баардык мамлекеттик ишканалар Мыйзамдан алынып салынды, эми жарандар мамлекеттик ишканалар эмнени, кандай баада сатып аларын билишпейт. Мына эми миллиард сомдук зыяндын бетин ачып жатышат.
Күлкүлүү эле болду, бизди тоноп кеткен канадалыктарды кууп чыгабыз деп убада берип, алтын казган ишканага бир жылда эле ушундай зыян келтирдик. Тендер коррупцияга каршы күрөштө панацея эмес, бирок жок дегенде мамлекеттик ишканалардын сатып алуу процесси ачык-айкын болушу керек. Азыр ар бир компания (аэропорттор, темир жол, Мегаком ж.б.) коомдук көзөмөлсүз товарларды сатып алууда”, – деди депутат.
Белгилей кетсек, КРнын Башкы прокуратурасы кечээ, 13-сентябрда Тенгиз Бөлтүрүктү убактылуу камакка алды. Себеби Эсеп палатасы Кумтөр кениндеги сатып алуулар боюнча финансылык мыйзам бузуулардын бетин ачкан болчу. Анда кенде күйүүчү-майлоочу май, азык-түлүк, запастык тетиктер рыноктук баалардан жогору баада сатып алынганы айтылган. Натыйжада, 1 млрд сомдук мамлекетке зыян келтиргени үчүн Башкы прокуратура «Кумтөр Голд Компани» ЖАКга карата үч кылмыш ишин козгогон.
