Баткен: КР Тажикстандын ТИМине нааразылык нотасын тапшырды
Бүгүн, 16-сентябрда тажик тараптын мыйзамсыз жана деструктивдүү аракеттерине байланыштуу Кыргызстандын Тышкы иштер министрлиги Тажикстандын Тышкы иштер министрлигине нааразылык нотасын тапшырды. Бул тууралуу ТИМдин маалымат кызматы билдирди.
Анда Тажикстан мурда жетишилген келишимдерди бузуу менен, чек арага алдын ала аскерлерин жайгаштырып, куралдуу күчтөрүн, оор аскер техникаларын колдонуп, Кыргызстандын чек арасынын бүткүл периметри боюнча чек ара жана жарандык объектилерин аткылаганы тууралуу айтылган.
Кыргыз тарап бардык жетишилген макулдашууларды так аткарууну, ок атышууну жана аскер бөлүктөрүн чыгарууну, ошондой эле чек ара аймактарында кырдаалдын курчушуна алып келүүчү кырдаалды түзбөөнү талап кылды жана дагы бир жолу баса белгиледи.
“Чек араны саясий жана дипломатиялык жол менен гана чечүү керек”, – деп айтылат маалыматта.
Эскерте кетсек, 14-сентябрда эртең менен кайрадан кыргыз-тажик чек арасында ок атылган. УКМКнын Чек ара кызматы билдиргендей, Кыргызстандын чек ара кызматкерлери Баткендин Булак-Башы тилкесинде кызмат өтөп жаткан учурда Тажикстандын чек арачыларын байкашкан. Алар мурда түзүлгөн келишимдерди бузуп, такталбаган чек ара тилкесинде күжүрмөн позицияларды ээлешкен.
15-сентябрда да кыргыз-тажик чек арасында ок атышуулар болуп, Чек ара кызматы ок атышууну Тажикстан тарап баштаганын билдирген. Анын айынан эки чек ара кызматкери, үч жай тургун жарадар болгон.
Бүгүн, 16-сентябрда эртең менен КР ӨКМнин Баткен облусу боюнча башкармалыгы, жергиликтүү ЖК комиссиясы менен биргеликте бир нече убактылуу жайгаштыруу пункттарын (ПВР) ачып, калкты кооптуу аймактардан эвакуациялоо боюнча иш чаралар уюштуруп жатат.
Мындан сырткары, жергиликтүү тургундар өздөрүнүн унаалары менен коопсуз аймактарга (туугандарыныкына) чыгып жатышат. Ак-Сай, Самаркандек, Ак-Татыр айылдарынан жарандар Рават айылына эвакуацияланган. Ал эми Баткен шаарында ачылган убактылуу жайгаштыруу пунктарына келген жарандар да бар.
Саат 10:30га карата: Лейлек району боюнча, Жаңы-Жер а/а Арка, Достук, Борбордук, Жаштык айылдарынын 70-80%элдери өз алдынча чыгып кетишкен.
Учурда Кыргызcтан менен Тажикстандын ортосунда ок атышууну токтотуу маселеси боюнча сүйлөшүүлөр жүрүп жатат. Бул тууралуу Улуттук коопсуздук боюнча мамлекеттик комитет билдирди.
Сүйлөшүүлөргө УКМК төрагасы Камчыбек Ташиев жана Тажикстандын Улуттук коопсуздук мамлекеттик комитетинин төрагасы Саймумин Ятимов катышууда. Бирок толук маалымат бериле элек.
