Энергетиктер Баткен облусунда электр энергиясын калыбына келтирүүнү улантышат
Бүгүн, 19-сентябрда өндүрүштүк оңдоо-түзөө иштерин бөлүштүрүү үчүн Баткен электр тармактар ишканасынын базасында энергетиктер чогулушту. Бул тууралуу “Улуттук электр тармагы” ишканасынын маалымат кызматы билдирди.
Улуттук аза күтүү күнү бир мүнөттүк эскерүү жана курман болгондор үчүн куран окулуп башталды.
“Бүгүн Баткен облусун электр энергиясы менен камсыздоону жандандыруу боюнча иштер активдүү башталат. Кыргыз-тажик чек арасындагы куралдуу жаңжалдын натыйжасында, Баткен облусунда 32 калктуу конуш — 10 миң үй электр энергиясыз калган”, – дейт ишкана.
Ошондой эле Баткен электр тармактары ишканасынын 6 ыкчам топ кызматкерлери 35-10 кВ Орто-Боз көмөк чордонундагы Тажикистан тарабынан ок атылгандан улам үзүлгөн аба-чубалгыларын калыбына келтирүү жумуштарын жасап жатышат.
“Оңдоп түзөө иштери бүтөөрү менен жарык берилет. Ошондой эле ишкананын жогорку чыңалуудагы кызматы ВЛ 35 кВ Шураб-Самаркандек үзүлгөн аба чубалгыларын калыбына келтирди”, – дейт “Улуттук энергохолдинг”.
