Бийлик элди тажиктерге салып берип жатат - Баткендин Аксай айылынын тургундары нааразы
Жергиликтүү басылманын Youtube каналында Баткендин Аксай элинин тургундарынын кайрылуусу чыкты. Анда аксайлыктар бийликтин кенебестигин, жыл сайын жаш балдар ал жерде шейит кетип жатканын айтып нааразы болушту.
Аксайдын тургундары канча жылдан бери ата-бабанын жайы деп гана жашап келгенин, кийиминен башка эч нерселери деле калбаганын, тынч жашоосу үчүн чечкиндүү бийлик керек экенин билдиришти.
“Бизге конфликт башталганда эле тажиктердин үстүнөн басымдуулук кылып турган, Аксай үчүн күйгөн жигиттер керек. Канча талап кылсак дагы бийлик өзүнүн камырабаган адамдарын коюп жатат. Алар болсо элди тажиктердин колуна салып берип жатат. Канчалаган жаш балдар өлүп калды.
ӨКМ баралбаган жерден, өзүбүздүн балдар портер менен алып келип жатышты. Бизге алсыз бийликтин кереги жок”, – деди Аксайдын тургуну.
Дагы бир тургун жергиликтүү бийликке барып, атайын аскердик курамдын катарына кирип, чек арадагы аймактардагы өзгөчөлүктөрдү көрсөтүп берүүнү сунуштаганын, бирок бийлик макул болбогонун айтат.
“Аксай деп эле жаш балдарды киргизе бербегиле, окко салып берип атасыңар, биз жергиликтүү калк билебиз, тоонун үстүнөн алып түшүп баралы, позицияларды билебиз десек, ага да уруксат жок. Жаш солдаттар эч нерсени билбей өлүп калып жатышат”, – дейт бийликке кайрылгандардын бирөөсү.
