Кыргыз-тажик мамлекеттик чек арасында абал туруктуу, бирок чыңалуу элементтери бар
УКМКнын Чек ара кызматынын маалымат кызматы бүгүн, 21-сентябрь саат 09.00гө карата Ош облусунун Чоң-Алай районундагы жана Баткен облусундагы кыргыз-тажик мамлекеттик чек ара тилкесинде абал чыңалуу элементтери сакталуу менен салыштырмалуу туруктуу деп маалымдашты.
Маалыматка таянсак, 20-сентябрдан 21-сентябрга караган түн тынч өттү, терс окуялар катталган жок.
Эскерте кетсек, 20-сентябрдан тарта мамлекеттик чек аранын кыргыз-тажик тилкесинде чек ара аймактарында жарылбай калган ок-дарылардан, миналардан, снарядтардан жана башка жардыргыч заттардан табуу, тазалоо жана зыянсыздандыруу иштери жүргүзүлүүдө.
“Мамлекеттик чек аранын кыргыз-тажик тилкесинде жайгашкан КР УКМКнын Чек ара кызматынын тарамдары күчөтүлгөн режимде кызмат өтөөнү улантууда”, – дейт аталган кызмат.
