Садыр Жапаров Нью-Йоркто бир катар маанилүү жолугушууларды өткөрдү
Президент Садыр Жапаров Нью-Йоркто өтүп жаткан БУУнун Башкы ассамблеясынын 77-сессиясына катышуунун алкагында бир нече өлкө лидерлери жана БУУ жетекчилери менен жолугушту. Бул тууралуу президенттин басма сөз кызматы билдирди.
Алгач Жапаров БУУнун Башкы катчысы Антониу Гутерриш менен жолугуп, Тажикстандын агрессиясын жана Тоолуу өлкөлөр фондун түзүү маселесин талкуулады.
Андан соң Түркиянын жана Швейцариянын мамлекет башчылары Реджеп Тайип Эрдоган жана Иньяцио Кассис менен эки жолугушуу өткөрүп, бардык багыттар боюнча кызматташуунун учурдагы абалы жана келечеги, ошондой эле кыргыз-тажик мамлекеттик чек арасындагы кырдаалды талкуулады.
Катардын эмири Тамим бин Хамад Аль Тани менен жолугушуу учурунда өз ара кызматташууну кеңейтүү жөнүндө сөз болду. Ошондой эле акыркы окуяларды эске алып, эгерде зарыл болсо, эмир Кыргызстанга жардам көрсөтүүгө даяр экенин билдирди.
Бириккен Улуттар Уюмунун Өнүктүрүү программасынын жетекчиси Аким Штайнер менен болгон жолугушууда экономика, азык-түлүк коопсуздугу, туруктуу өнүгүү, өзгөчө тоолуу аймактарды өнүктүрүү программалары жөнүндө сөз болуп, Штайнер жапа чеккен райондордогу социалдык объектилерди калыбына келтирүүгө колдоо көрсөтүүгө даяр экендигин билдирди.
Ал эми БУУ Азык-түлүк жана айыл чарба уюмунун башкы директору (ФАО) Цюй Дунъюй менен жолугушууда президент айыл чарба жана азык-түлүк коопсуздугу жаатында эки тараптуу кызматташуу маселелерин талкуулашты.
Жолугушуулардын көбүндө кыргыз-тажик чек арасындагы кандуу окуялар талкууланып, Жапаров тажик тарап алдын ала өз аскерлерин кыргыз чек арасына топтоп, өзүнүн куралдуу күчтөрүн жана оор аскердик техникасын колдонуп, Кыргызстандын аймагындагы чек аралык жана жарандык объектилерге, ошондой эле калктуу конуштарга чабуул жасаганын баса белгиледи.
Ал ошондой эле тажик тараптын кол салуусу карапайым калк жана аскер кызматкерлеринин арасында орду толгус жоготууларга алып келгенине, аскердик жана жарандык инфраструктурага олуттуу зыян келтирилгендигине токтолду.
Жетекчилердин баары каза болгон жарандар үчүн Жапаровго көңүл айтып, кыргыз-тажик чек арасындагы конфликт эртерээк чечилсин деген үмүттөрүн билдиришти.
