Мобилизация жарыялангандан кийин Москвадан Бишкекке авиабилеттердин баасы 110 миң сомдон ашып кетти
Кечээ, 21-сентябрда, Россияда мобилизация жарыяланганы тууралуу кабар айтылгандан кийин Россиядан билеттердин баасы кескин кымбаттады. Economist.kg-нин редакциясы бул Кыргызстанга карай авиабилеттерге кандайча таасир эткенин текшерип көрдү.
Aviasales кызматынын маалыматы боюнча, 22-сентябрга карата Москвадан Бишкекке түз эмес, башка шаар аркылуу авиабилеттердин (жол убактысы 24 сааттан ашык) эң арзанынын баасы 79 миң сомго жетип, ал эми эң тезинин (жолдо 10 саат) баасы 111 миң сомго жеткен.
Башка күндөр үчүн да абал жакшы эмес. Билеттер азайган, түз каттамдар дээрлик жок. Ал эми башка шаарлар аркылуу рейстерге баасы 40 миң сомдон 90 миң сомго чейин бир-эки билет калган.
Билет издөө кызматындагы баалар улам өзгөрүп жатканын да белгилей кетүү керек. Баалар өйдө-ылдый секирип, кээде шумдуктуу санга чейин көтөрүлүп, кээде кайра 35-40 миңге чейин түшүп жатат.
