Баткен облусунда талкаланган үйлөр жыл аягына чейин калыбына келтирилет
Баткен облусунда Тажикстандын кол салуусунун натыйжасында талкаланган үйлөр ушул жылдын аягына чейин калыбына келтирилет. Бул тууралуу бүгүн, 26-сентябрда, президенттин басма сөз катчысы Эрбол Султанбаев билдирди.
Анын айтымында, президент Садыр Жапаровдун тапшырмасы менен курулуш жана калыбына келтирүү иштери башталган.
Андан тышкары, буга чейин президенттин, минкабдын, президенттик аппараттын чечимдерин даярдоо бөлүмүнүн башчысы Айбек Жунушалиев да Баткен облусунун жашоочулары менен жолугушууда үйлөр 26-сентябрдан баштап курула баштаарын билдирген.
«Жабыркаган турак-жайларды эл аралык уюмдардын өкүлдөрү карап чыгышты. Дүйшөмбүдөн баштап курулуш техникасы келет. Каржылоо республикалык бюджеттен бөлүнөт. Үйлөр кирпичтен салынып, чатырлары монолит менен жабылат. Бардык эски объектилер бузулуп, ордуна жаңылары тургузулат», – деди ал.
Эскерте кетсек, акыркы маалыматтар боюнча Баткен облусундагы чек аралык уруштун натыйжасында 62 жараныбыз каза болуп, 198 киши ар кандай жаракат алып, 430дан ашык үй, ошондой эле мектептер, бала бакчалар жана башка административдик имараттар талкаланып, бузулган. А эми 136 миң 770 жаран үйлөрүн таштап кетүүгө аргасыз болгон.
