Кыргызстан менен Тажикстандын УКМК жетекчилери кайрадан сүйлөшүштү – кандай келишим түзүлдү

Кечээ, 25-сентябрда, «Кызыл-Бел» (КР) өткөрүү пунктунда Кыргызстан менен Тажикстандын өкүлдөрү жолугушту. Бул тууралуу Чек ара кызматынын маалымат жана байланыш башкармалыгы билдирди.

Сүйлөшүүлөрдүн жыйынтыгында минкаб төрагасынын орун басары – КР УКМК төрагасы, генерал-лейтенант Камчыбек Ташиев жана Тажикстандын УКМК төрагасы Саймумин Ятимов чек ара аймактарындагы абалды турукташтыруу боюнча Кыргызстан менен Тажикстандын делегацияларынын жолугушуу протоколуна кол коюшту.

Эки тарап “Тамдык” (КР) жана “Бедак” (ТР) заставаларынын, “Булак-Башы” (КР) жана “Кех” (ТР) постторунун, “Катта-Туз” (КР) жана “Каракчикум” (ТР) постторунун, Чайхана аймагындагы “Ак-Сай” (КР) жана Ходжаи-Аъло аймагындагы “Шаршара” (ТР) постторунун айланасында эч кандай чек араны коргоо бөлүктөрүн жайгаштырбоо жөнүндө макулдашышты.

Бул бөлүмдөрдүн имараттарында жана курулмаларында иш токтотулат. Бул аймактардагы кыргыз-тажик мамлекеттик чек арасын мобилдик чек ара наряддары кайтарышат, алар чек араны так белгиленген жана макулдашылган маршруттар боюнча кыдырып турушат.

Мындан тышкары, эки тарап чыр-чатактар ​​көп чыккан аймактарга видеобайкоо камераларын орнотуу боюнча паритеттик негизде макулдашышты.

Белгилей кетсек, посттор дайындалган аймактарда калк жашабайт. Ошол эле учурда жергиликтүү өз алдынча башкаруу органдары Кыргызстандын жана Тажикстандын жарандары мурда пайдаланылып келген Тамдык (КР) – Бедак (ТР) жана Булак-Башы (КР) – Кех (ТР) жер тилкелеринде айыл чарба иштерин жүргүзүүнү камсыз кылууга тийиш.

Протоколго ылайык, биргелешкен жумушчу топтун аскерлерди жана оор аскердик техниканы, кошумча күчтөрдү жана каражаттарды чек ара аймактарынан чыгаруу боюнча иши улантылат.