Бишкектеги 101 маршруттук линиянын 22си гана муниципалитеттин карамагына өткөн
Бүгүн, 27-сентябрда Жогорку Кеңештин Транспорт, коммуникациялар, архитектура жана курулуш боюнча комитетинин кезектеги жыйынында Бишкек шаарындагы жол-транспорт тармагынын учурдагы абалы талкууга алынды.
Бишкек шаарынын мэриясынын Транспорт жана жол транспорт инфраструктурасын өнүктүрүү департаментинин директору Максат Нусувалиевдин айтымында, борбордо 101 маршруттук линия бар.
“2013-жылдан бери мэрияга бир тыйын да түшө элек, мисалы, айрым фирмалар жарым жылдыкта болгону 4800 сом салык төлөшкөн. Үстүбүздөгү жылдын 1.5 айында 22 маршруттук линияны муниципалитеттин карамагына өткөрүүдөн бюджетке 1 млн 270 миң сом түштү”, – деди ал.
Өз кезегинде депутат Улугбек Ормонов транспорт уюмдарынын ишин салыктык чегерүүлөрү боюнча текшерүүнү сунуштаса, депутат Эльдар Сулайманов унаа токтотууучу жайлардын жетишсиздигине жана борбор калаада транспорттук түйүндөрдү куруу зарылчылыгына токтолуп, автоматташтырылган акы төлөнүүчү унаа токтотуучу жайларды ачуу керектигин кошумчалады.
Депутат белгилегендей, бул жолдогу унаа тыгындарын азайтууга өбөлгө түзмөк. Бул сунуш боюнча вице-мэр Нурдан Орунтаев муниципалдык унаа токтотуучу жайларды техникалык модернизациялоо боюнча мамлекеттик-жеке өнөктөштүктүн алкагында өнөктөштөрдү тандоонун жыйынтыгы чыгарылып жатканын билдирди.
