«Эйрбас Хеликоптер» компаниясы ӨКМ менен бирге «Тоо учкучтарын атайын даярдоочу борбор» түзүүнү сунуштады
Кечээ, 27-сентябрда Өзгөчө кырдаалдар министри Бообек Ажикеев “Эйрбас Хеликоптер” компаниясынын вице-президенти Томас Земан менен жолугушту. Бул тууралуу министрликтин маалымат кызматы билдирди.
Жолугушуунун жүрүшүндө министр Ажикеев алгач Кыргызстандагы болуп өткөн чек арадагы акыркы окуяларда ӨКМдин тоодон куткаруу, туристтик жана альпинисттик багыттагы куткаруу иштерине республикалык бюджеттин эсебинен жаңы сатып алынган акыркы үлгүдөгү Airbus – H-125 тик учагы колдонулганын, аз орундуу болгон менен аскердик тик учактар коно албай турган кууш тилкелерге конуу, үнөмдүүлүгү менен өтө ыңгайлуу экендигин айтты.
Анын айтымында, Кыргызстан бийик тоолуу өлкө болгондуктан, “Эйрбас Хеликоптер” компаниясынын чыгарган тик учагынын ыңгайлуулугуна карап, бийик тоо кыркаларында калып калган альпинисттерди, адамдарды тоодон куткаруу үчүн кийинки тик учакты сатып алуу кызыкчылыгы жаралган. Ошондой эле 2021-жылы РФ аркылуу үчүнчү тик учак алуу макулдашылган.
Берилген маалыматка таянсак, “Эйрбас Хеликоптер” компаниясы ӨКМ менен биргеликте “Тоо учкучтарын атайын даярдоочу борбор” түзүү сунушун карап көрүүнү билдирген.
“Жолугушуунун жүрүшүндө Томас Земан мырза Өзгөчө кырдаалдар министрлиги менен эки тараптуу кызматташууга кызыкдар экендигин жана жакында келе турган Airbus – H-145 тик учагын белгиленген мөөнөттө Кыргызстанга жеткирүүнү пландап жатышкандыгын билдирди. Ошондой эле эки тарап учкучтарды даярдоочу биргелешкен борборду түзүү маселесин бирге талкуулашты”, – деп айтылат маалыматта.
