Кыргызстан кышка карата Казакстан, Түркмөнстан жана Өзбекстандан электр энергиясын импорттойт
“Улуттук энергохолдинг” тарабынан күз-кыш мезгилине даярдык көрүлүп жатканын аталган мекеменин маалымат кызматы кабарлады.
“Улуттук энергохолдинг” Кыргызстан күз-кыш мезгилин өтүү үчүн коңшу республикалардан электр энергиясын импорттоого Казакстан (450 млн кВтс көлөмдө), Түркмөнстан (1 002 млн кВтс көлөмдө) жана Өзбекстан менен (1300 млн кВтс көлөмүндө) келишим түзгөнүн жана азыркы учурда импорттолуп жатканын билдирди.
Ошондой эле Бишкек жана Ош шаардык ЖЭБине отун ресурстарын даярдоо боюнча иш-чаралар да жүрүүдө. Бишкек шаардык ЖЭБ үчүн 1050 миң тонна өлчөмүндө Кавак кенинен көмүрдү жеткирүү жүрүп жатат. Бүгүнкү күнгө 159.21 миң тонна жеткирилген. Азыркы учурда жеткирүү боюнча графикти кууп жетүү жана кошумча 400 миң тонна көмүр алуу боюнча иш-чаралар жүрүүдө.
Белгилей кетсек, бул жылдын 28-сентябрына карата Токтогул суу сактагычындагы суунун көлөмү 13.6 млрд м3 түздү, 2021-жылдын ушул мезгилине 12.3 млрд м3 түзгөн, өткөн жылга салыштырмалуу суу сактагычтын көлөмү 1.3 млрд м3 көбүрөөк.
“Бардык оңдоо иштери бекитилген графикке ылайык жүргүзүлүүдө, учурда күз-кыш мезгилине даярдоо боюнча 90% иш аткарылды”, – дейт “Улуттук энергохолдинг”.
