Биздин милдет - стартап ишканаларды колдоо, керектүү рынокторго чыгууга жардам берүү - Умбриэль Темиралиев
Кечээ, 29-сентябрда Инвестициялар боюнча улуттук агенттиктин директору Умбриэль Темиралиев маалымат жыйынын өткөрүп, анда агенттиктин башчысы инвестицияларды тартуу пландары менен бөлүштү.
Улуттук агенттиктин жетекчилиги өлкөгө инвестицияларды тартуу жана аларды коргоо боюнча жаңы ыкмаларды иштеп чыгып жатканын белгиледи.
Агенттик эки негизги багытта иш жүргүзөт:
- Инвестициялоо процессин жеңилдетүү, инвесторлордун укуктарын коргоо бөлүгүндө мыйзамдарды жана ЧУАларды өркүндөтүү
- Мамлекеттик долбоорлорго, мамлекеттик-жеке өнөктөштүк (МЖӨ) долбоорлоруна жана жеке секторго каражаттарды натыйжалуу тартуу үчүн өлкөнүн бизнес коомчулугу менен кызматташуу.
Темиралиев журналисттерге мамлекеттик-жеке өнөктөштүк программасынын максаттары, үзгүлтүксүз туристтик агымды көбөйтүү максатында туризмди өнүктүрүү потенциалы, экспорттук потенциалды жана чет өлкөлүк түз инвестицияларды көбөйтүү боюнча чаралар жөнүндө айтып берди.
Мындан тышкары, ведомствонун башчысы батир маселесин чечүү жана энергетикалык, жылуулук, суу ресурстарына жана инженердик тармактарга болгон жүктү азайтуу максатында спутник-шаарларын куруунун зарылдыгы жөнүндө айтты.
“Киреше жана өнүктүрүү боюнча натыйжалуу багыттарынын бири – айыл чарбасы болуп саналат. Биздин милдет – стартап ишканаларды колдоо, өндүрүш процесстери боюнча кеңеш берүү, аларга заманбап жабдууларды сатып алууга жана керектүү рынокторго чыгууга жардам берүү. Биринчи кезекте, чакан жана орто бизнести колдоо зарыл”, – деди ал.
Ушул себептен Улуттук агенттик башка мамлекеттик органдар менен биргеликте венчурдук жана гибриддик каржылоо үчүн механизмдерди, ошондой эле кластердик ассоциациялардын ишин түзүүнүн үстүндө иштеп жатканын билдирди.
