Ала-Букада айыл чарба продукциясын экспорттоо боюнча жаңы логистикалык борбор ачылды
Жалал-Абад облусунун Ала-Бука районунда айыл чарба продукциясын экспорттоочулар үчүн жаңы логистикалык борбор ишке кирди. Бул тууралуу USAIDдин Кыргызстандагы өкүлчүлүгү билдирди.
Бул борбор USAID Агросоода долбоорунун алкагында «Бай Дыйкан Ала-Бука» айыл чарба кооперативи менен биргеликте ачылды. USAID борборго муздаткыч комплекти, тамак-аш сактоочу кутуларды жана бак-дарактарга себилүүчү каражат берди.
Долбоор ошондой эле кооператив мүчөлөрүнө жемиш дарактарды багуу ыкмаларынын түрлөрүн үйрөттү. Натыйжада кооператив бак-дарактарды багуу боюнча кызмат жана 120 тонналык муздак сактоочу жайды сунуш кыла баштады.
Жаңы логистикалык борбор жергиликтүү фермерлерге жана соодагерлерге продукциянын сактоо мөөнөтүн узартуу менен кирешелерин көбөйтүүгө мүмкүндүк берет. Бул аймакта негизинен алма жана кара өрүк өстүрүлүп, сакталып, андан ары (чийки жана кургатылган түрдө) Өзбекстанга экспорттолот.
