Минкаб Баткендеги жабыркаган үйлөрдү оңдоого 300 миң сомдон бөлүүнү тапшырды
Минкаб тиешелүү органдарга үйлөрү талкаланган жана капиталдык оңдоого муктаж жарандарга эки этап менен 300 миң сомдон бир жолку материалдык жардамды атайын эсептен бөлүп берүүнү тапшырды.
Бул тууралуу Баткен жана Ош облустарында Тажикстандын куралдуу агрессиясынан жапа чеккен аймактарды калыбына келтирүү жана өнүктүрүү боюнча мамлекеттик комиссиянын жыйынында белгилүү болду.
Өкмөттүн басма сөз кызматы билдиргендей, үйлөрү жабыркаган, бирок капиталдык оңдоого муктаж үйлөрдүн категориясына кирбей калган жарандарга 100 миң сомдон материалдык жардам көрсөтүлөт.
Минкаб башчысы Акылбек Жапаров суук түшкөнгө чейин жабыркаган турак жайларды калыбына келтирүү керектигин айтты. Бул үчүн Ош жана Жалал-Абад облустарынан керектүү атайын техникалар жана адистер чакырылат.
«Турак жайларды калыбына келтирүү иштери тез арада жүргүзүлүшү керек. Баткен жана Лейлек районунун тургундарына өзгөчө мамиле жасалат, алар бардык зарыл нерселер менен толук камсыз болушу керек. Атайын эсепке жарандардан 307 млн сом түшкөн. Бул каражаттардын ар бир тыйыны Баткен облусунун тургундарына берилет. Бул маселени мен өзүм көзөмөлдөйм», – деди ал.
Мамлекеттик комиссиянын отурумунун жыйынтыгында мамлекеттик жана жергиликтүү бийлик органдарына бир катар тапшырмалар берилди.
