ЖК комитети Эл аралык өнүктүрүү ассоциациясы менен 30 млн долларга кредиттик келишимдин долбоорун жактырды
Бүгүн, 3-октябрда, Жогорку Кеңештин Бюджет, экономикалык жана фискалдык саясат боюнча комитети Кыргызстан менен Эл аралык өнүктүрүү ассоциациясынын (ЭӨА) ортосундагы “Социалдык жардам көрсөтүү программаларын жана эмгек рыногун чыңдоо” долбоорун каржылоо жөнүндө макулдашуунун долбоорун карап чыгып, жактырды.
Насыянын суммасы 30 млн долларды түзөт. Бул тууралуу парламенттин басма сөз кызматы билдирди.
Эмгек министринин орун басары Нурдөөлөт Базарбаевдин айтымында, бул долбоордун максаты экономикалык кризистин аз кирешелүү үй-бүлөлөргө жана эмгек мигранттарына тийгизген таасирин жеңилдетүү, ошондой эле социалдык жардам көрсөтүү жана эмгек рыногунун программаларынын ишин жакшыртуу болуп саналат.
Мындан тышкары, Макулдашуунун долбоору социалдык коргоо системасын чыңдоого, калктын айрым топторун колдоонун натыйжалуулугун жогорулатууга, жакыр жана аялуу катмардагы жаштардын кесипкөйлүгүн өстүрүүгө жана ишке орношуу мүмкүнчүлүктөрүн кеңейтүүгө багытталган.
Базарбаев ошондой эле бул келишимдин алкагында жаштардын квалификациясын жогорулатууга жана ишке орношуу мүмкүнчүлүгүн жакшыртууга багытталган иш-чаралар каржылана турганын тактады.
