Быйыл энергетика тармагын өнүктүрүүгө 12 млрд сом бөлүндү - бирок КР кышка карата коңшу өлкөлөрдөн электр энергиясын импорттойт
Үстүбүздөгү жылы энергетика тармагын өнүктүрүүгө рекорддук 12 млрд сом бөлүндү. Бул тууралуу минкабдын төрагасы Акылбек Жапаров экономика тармактары менен калкты 2022-2023-жылдардын күз-кыш мезгилине даярдоо боюнча кеңешмеде айтты.
Жыйындын жүрүшүндө Жапаров Энергетика министрлигинин борбордук аппаратынын жамаатына министрдин милдетин аткаруучу Таалайбек Ибраевди тааныштырып, министрликтин алдында бир катар маанилүү милдеттер турганын белгиледи.
“Үстүбүздөгү жылы энергетика тармагын өнүктүрүүгө рекорддук 12 млрд сом бөлүндү, башталган реформалар аягына чыгышы керек, бөлүштүрүүчү компаниялардын ишин карап чыгуу керек. Сандарды карасак, эбегейсиз өлчөмдөгү киловатт электр энергиясы кайда кетип жатканы азыркыга чейин белгисиз. Секирик жасаш керек, бул үчүн сизде да бардык мүмкүнчүлүктөр бар”, – деди ал.
Эскерте кетсек, “Улуттук энергохолдинг” Кыргызстан күз-кыш мезгилинен өтүү үчүн коңшу республикалардан электр энергиясын импорттоого Казакстан (450 млн кВтс көлөмдө), Түркмөнстан (1 002 млн кВтс көлөмдө) жана Өзбекстан менен (1300 млн кВтс көлөмүндө) келишим түзгөнүн жана азыркы учурда импорттолуп жатканын билдирген болчу.
