Президент «Кемпир-Абад» суу сактагычы боюнча Өзгөндө эл менен жолугушууда - активисттердин телефондору өчүртүлүп жатканы айтылууда
Президент Садыр Жапаров “Кемпир-Абад” суу сактагычы боюнча Өзгөн шаарында жергиликтүү эл менен жолугушуу өткөрүүдө. Жолугушуу жабык өтүп, ага кирген активисттердин телефондору өчүртүлүп жатканы айтылууда. Бул тууралуу “Бибиси” билдирди.
Аталган портал Өзгөнгө президент менен жолугушууга келген эл көп болгондуктан көбү акимиаттагы жыйындар залына батпай, сыртта калышканын, андыктан чогулгандар президенттие сыртка чыгуусун талап кылып жатышканын айтат.
Өзгөн шаарында өтүп жаткан жыйынга Жогорку Кеңештеги ар бир фракцияларынан экиден депутат да катышып жатат. Парламенттеги оппозициялык фракция, “Кемпир-Абад” боюнча бийликти сындап келген “Бүтүн Кыргызстандан” Адахан Мадумаров менен Исхак Масалиев дагы Өзгөндөгү эл менен жолугушууга келген.
“Кемпир-Абад маселеси боюнча депутаттар менен жолугушуу уюуштурулат деген. Бирок ушундай чоң маселе боюнча жыйынды Өзгөн акимиатынын кичинекей залына уюуштуруптур. Бул жерде батптаган эл канча? Жыйынды стадиондо уюуштурушса болмок экен деп наараазы болуп атышат. Алардын үнүн угайын деген эч ким жок. Жыйынга кире албай канчасы турат. Чөнтөк телефондорун алып калып, жыйынга киргизип жатышат”, – деди учурда жеринде жүргөн активист Бек Үмүралиев.
Эскерте кетсек, 29-сентябрда Өзгөн райондук мамлекеттик администрациясынын алдына ондогон адам чогулуп, Кемпир-Абад суу сактагычы боюнча УКМКнын төрагасы Камчыбек Ташиевге кайрылышкан.
Алар Ташиев менен Өзбекстандын премьер-министри тарабынан кол коюлган 36-протокол боюнча түшүндүрмө берүүнү талап кылышкан. Анткени буга чейин социалдык түйүндөрдө аталган суу сактагыч Өзбекстанга өтөт экен деген кептер тараган.
Белгилей кетсек, Жапаровдун Өзгөн жергесине болгон иш сапары тууралуу президенттин маалымат кызматы эч кандай маалымат бере элек.
