Жыл башынан бери мамлекеттик ишканалардын кирешеси 9.5 млрд сомдон ашты
Жыл башынан бери мамлекеттик ишканалардын кирешеси 9.5 млрд сомдон ашты. Бул тууралуу “Кабар” агенттигинде өткөн маалымат жыйынында КР Экономика жана коммерция министрлигине караштуу Мамлекеттик мүлктү башкаруу фондунун директору Мирлан Бакиров билдирди.
Мамлекеттик мүлктү башкаруу фондунун алдын ала эсептөөлөрү боюнча, 2022-жылдын 9 айында мамлекеттик ишканалардын таза кирешеси 1.3 млрд сом, ал эми мамлекеттин үлүшү бар акционердик коомдордун кирешеси 8.5 млрд сомду түзгөн.
«Үстүбүздөгү жылдын тогуз айынын жыйынтыгы боюнча 8.5 млрд сом күтүлүп жатат. Мамлекеттик ишканалар өткөн жылды 2 млрд сом таза киреше менен аякташты. Быйыл тогуз айдын жыйынтыгы боюнча 1 млрд 300 млн сом түшөрү күтүлүүдө», – деди Бакиров.
Ал кошумчалагандай, бүгүнкү күндө фонд мамлекеттик ишканалар ижарага алган жерлерди аныктоо боюнча иш алып барууда, анын эсебинен былтыркы көрсөткүчтөрдөн ашып кетиши күтүлүүдө.
Маалым болгондой, өткөн жылдын аягында мамлекеттин катышуусу бар акционердик коомдордун жалпы таза кирешеси – 11 млрд сомдон ашык, ал эми мамлекеттик ишканалардыкы – 2 млрд сомдон ашкан болчу.
