Бийлик Улуттук банкка комбанктар Баткендеги бизнес долбоорлорго насыя берүүнүнүн механизмдерин карап чыгуусун тапшырды
Министрлер кабинетинин төрагасынын орун басары Бакыт Төрөбаев КРнын өнүктүрүү институттарынын Координациялык кеңешинин жыйынын өткөрүп, анда үстүбүздөгү жылдын сентябрь айында Тажикстан тараптын куралдуу агрессиясынын натыйжасында жабыркаган Баткен облусунун ишкерлерине колдоо көрсөтүү маселелерин талкуулады. Бул тууралуу минкабдын маалымат кызматы билдирди.
Төрөбаев мамлекеттик банктарды жана өнүктүрүү фонддорун бизнес чөйрөсүн калыбына келтирүүгө жигердүү катышууга жана Баткен облусунун Лейлек жана Баткен райондорунда иш менен камсыз кылууга жана жергиликтүү экономиканы өнүктүрүүгө өбөлгө түзүүчү бизнес долбоорлорду тез арада каржылоого киришүүгө чакырды.
“Жыйында Улуттук банкка коммерциялык банктар тарабынан бизнес-долбоорлорго кредит берүүнүн форматын жана механизмдерин кайра карап чыгуу, же өзгөртүү сунушталды, мында көпчүлүк мекендештерибиздин күрөөгө коюлчу мүлкү жана чет элдик валютада кредиттерди алууга мүмкүнчүлүгү жок экендигин эске алуу менен долбоорлорду каржылоо механизмине басым жасалды”, – деп айтылат маалыматта.
