Кыргызстан KOICA менен биргеликте 48 млн доллардык 10 долбоорду ишке ашырат
Кыргызстан Корей эл аралык кызматташтык агенттиги (KOICA) менен биргеликте 48 млн долларлык 10 долбоорду ишке ашырат. Бул тууралуу Экономика жана коммерция министри Данияр Амангелдиев KOICAнын президенти Сон Хюк Санг мырза менен жолугушуусунда айтылды. Мындай маалыматты аталган министрликтин басма сөз кызматы билдирди.
Маалыматка ылайык, тараптар мамлекеттик башкаруу, айыл чарба, санариптештирүү, саламаттыкты сактоо жана аймактарды өнүктүрүү өңдүү тармактарда жалпы суммасы 48 млн доллардан ашык ишке ашырылып жаткан 10 долбоор, адам ресурстарын өнүктүрүү программасы жана волонтердук программа боюнча пикир алышты.
Өз кезегинде KOICAнын президенти Сон Хюк Санг мырза KOICAнын КРдагы өкүлчүлүгүнүн жана КРнын Өкмөтүнүн жакшы координацияланган ишин белгилеп, социалдык-экономикалык өнүктүрүүгө жана өлкөнүн жарандарынын жыргалчылыгына багытталган долбоорлорду улантуунун маанилүүлүгүн баса белгиледи.
Министр Амангелдиев өз кезегинде кореялык тарапты KOICAнын контр-өнөктөшү катары кыргыз тарап KOICAнын Кыргыз Республикасындагы кеңсесинин толук кандуу иштешине ар тараптуу жардам көрсөтөрүнө ишендирди.
Жолугушуунун жыйынтыгында тараптар жакынкы жылдарга артыкчылыктуу багыттар боюнча мындан аркы жемиштүү кызматташуу боюнча макулдашууга жетишти.
