Финансы министрлиги менен Соцфонддун туура эмес эсебинен 380 млн сом ашыкча которулган
Финансы министрлиги менен Соцфонддун туура эмес эсебинен 380 млн сом Соцфондго ашыкча которулган. Бул тууралуу Жогорку Кеңештин Социалдык саясат боюнча комитетинин жыйынында айтылды.
Жыйында комитеттин мүчөсү Жылдыз Садырбаева социалдык төлөмдөргө каражат жетпей жатса, аудиттин жыйынтыгында 380 млн сом эмне үчүн Соцфонддо бир жыл бою колдонулбастан жөн эле турганына жана ал кайсы банкта жатканына, бул кимдин катасы экенине кызыкты.
Эсеп палатасынын өкүлү Алимжан Байгазаков аталган каражат сапаттуу эсептелбегендиктен ушундай көрүнүш болгонун айтты.
“Жылдын башында сапаттуу эсептелбегендиктен республикалык бюджеттен Соцфондго ашыкча которулган. Текшерүүнүн жыйынтыгында ал республикалык бюджетке кайтарылды. Финансы министрлиги жана Соцфонддун кызматкерлери туура эмес эсептешкен”, – деди Байгазаков.
Ал эми Соцфонддун төрагасы Бактияр Алиев бул кадимки эле көрүнүш экенин айтты.
“Бул жыл сайын эле болуп келет, жылдын аягында ашкан сумманы кайра бюджетке өткөрүп беребиз. Анткени Соцфонд бир жыл ичинде канча пенсионер көз жумат, канчасы көчүп кетет билбейт. Бирок 2023-жылга тагыраак эсептегенге аракет кылып жатабыз. Ошондо деле так сандарды айта албайбыз. Аудит жыл сайын жазбайт эле, ушул жылы жазып калыптыр. 70 млрд сомдон 200 млн сом жыл сайын эле калып турат”, – деди Алиев.
Депутат Эсеп палатасы каржылык мыйзам бузуу деп эсептесе, демек, жазылыш керек деди.
