Ысык-Көлдө беш жылдыздуу мейманкана курууга 50 млн долларлык келишим иштелип чыгат - ОКӨФ
Орус-кыргыз инвестициялык форумдун жыйынтыгында 500 млн долларлык инвестициялык долбоорлорду ишке ашыруу боюнча 20 документке кол коюлганын Орус-кыргыз өнүктүрүү фонду билдирди.
«Ысык-Көлдө беш жылдыздуу мейманкана куруу үчүн 50 млн долларга келишим иштелип чыгат. Келерки жылы аны ишке ашырууга киришебиз деп ишенем. Ошондой эле күн станцияларын куруу, темир жолго жогорку сапаттагы россиялык жабдууларды, Ош шаардык мэриясы үчүн жүргүнчүлөрдү ташуучу автобустарды алып келүү боюнча келишимдерге кол коюлду», – деди ОКӨФ башкармалыгынын төрагасы Артем Новиков.
Буга чейин Economist.kg кабарлагандай, Баткен облусунда газобетон заводун түзүү боюнча эң ири долбоорго капсула салынып, курулуш иштери башталган. Тагыраак айтканда, ОКӨФ Баткен районунун Халмион айылында КРдагы биринчи автоклавдык газобетон чыгаруучу заводдун курулушун каржылайт. Заводдун кубаттуулугу жылына 160 миң куб метрди түзөрү белгиленген.
