Баткен үчүн эң мыкты санариптик долбоорго Жогорку технологиялар паркы 1 млн сом бөлөт
Жогорку технологиялар паркынын (ЖТП) Байкоочу кеңешинин мүчөлөрү облуста болуп өткөн кайгылуу окуяларга байланыштуу баткендиктерди колдоо максатында 2 млн сом бөлүүнү чечти.
ЖТП Баткен облусунун тургундарынын жашоосун жакшыртууга жардам бере турган санариптик чечимди ишке ашырууга 1 млн сом бөлөт. Сынактын шарттары жакынкы аралыкта жарыяланышы күтүлүүдө.
«Сынакка Баткен облусуна жардам берүү үчүн санариптик долбоорду иштеп чыккан Кыргызстандын бардык IT адистери катыша алат. Бул телемедицина же башка сегмент болушу мүмкүн», – деди ЖТПнын аткаруучу директору Чубак Темиров Economist.kg басылмасына.
Белгилей кетсек, парктын бюджетинен дагы 1 млн сом жабыр тарткан облус тургундары үчүн президенттин Баткен облусундагы ыйгарым укуктуу өкүлчүлүктүн атайын эсебине которулган.
