КР көмүрдү экспорттоого убактылуу тыюу салууну көздөөдө
КР 17-октябрдан баштап көмүрдү экспорттоого убактылуу тыюу салат. Мындай маалыматты Энергетика министри Таалайбек Ибраев маалымат жыйынында билдирди.
Министр өлкөдө көмүргө суроо-талап көп болгондуктан, тыюу салуу пландалып жатканын айтты.
“Бүгүнкү күндө Кара-Кеченин көмүрүн 20 тонналык фуралар менен чет жакка чыгарып жатышат. Алсак, ушул жылдын январь-сентябрында 178 миң 264 тонна көмүр экспортко кеткен. Бирок өлкөдө көмүр таңкыстыгы жок. Ата мекендик жана импорттук көмүрдү жеткирүү өз убагында аткарылууда”, – деди Ибраев.
Ошондой эле ушул эле жыйында октябрь айында кызматка дайындалган “Электр станциялары” ААКнын башкы директору Айбек Айдаралиев Бишкек жылуулук электр борборуна (ЖЭБ) алына турган 400 миң тонна импорттук көмүр тендерсиз алына тургандыгын билдирди.
“Кызматка келгенде экономикалык жана техникалык жактан анализ жүргүзүп, калкты электр энергия менен үзгүлтүксүз камсыздоо үчүн кошумча 400 миң тонна көмүр сатып алуу чечими чыккан. Аны сатып алууга бюджетте каражат жетиштүү. Көмүр алуу үчүн тендер өткөрүүгө убактыбыз жок, эртең ноябрь. Андыктан ортомчу жок бир булак менен келишим түзүлөт”, – дейт ал.
Белгилей кетсек, министр Ибраевдин айтымында, күз-кыш мезгилине көмүр, газ, мазут, электр жарыгын алууга 9 млрд сом каралган.
