Кыргызстанга келген россиялыктардын 96%дан ашыгы өлкөдөн чыгып кетишти - Эмгек министрлиги
Үстүбүздөгү жылдын январь айынан сентябрга чейин Кыргызстанга 760 миң россиялык жаран келген. Алардын 730 миңи өлкөдөн чыгып кеткен. Бул тууралуу Эмгек жана социалдык өнүктүрүү министри Кудайберген Базарбаев парламенттин жыйынында билдирди.
Депутат Надира Нарматова россиялык жарандардын массалык агымына тынчсызданды. Анын айтымында, учурда өлкөдө Россиядан аскерге чакырылгандар көп, бул мамлекеттин коопсуздугуна коркунуч жаратат.
УКМКнын өкүлү Канжар Бакаев ведомстводо КРга келген бардык россиялыктар тууралуу маалымат бар экенин белгиледи.
«Бизге келген россиялыктардын так саны бар. Алардын эсеби жана өлкөдө жүрүү убактысы бар. Ички иштер министрлиги менен биргеликте алардын экстремисттик жана террористтик топторго тиешеси бар же жок экенин текшерип жатабыз», – деп жооп берди Бакаев.
Эске салсак, 21-сентябрда орус бийлиги жарым-жартылай мобилизация жарыялаган. Андан кийин Грузия, Казакстан, Кыргызстан жана башка өлкөлөргө кеткен орус жарандарынын агымы көбөйгөн.
Кошумча окуңуз:
Марттан бери Кыргызстанга Россия, Беларусь жана КМШ өлкөлөрүнөн 50дөн ашык IT-компаниялар келишти
Россиялыктардын агылып келиши Кыргызстандын экономикасына кандай таасир этет?
Кыргызстанга кызыккан россиялыктар көбөйдү — сегиз айда 170 миң орус жараны катталды
Кыргызстан россиялыктар жайында эс алууну пландаган алдыңкы үч өлкөнүн катарына кирди
