Финансы министрлиги Баткен облусуна 210 млн сом которду
Финансы министрлиги Баткен облусуна 210 млн сом которду: 100 млн сом тургундарды колдоого жана оңдоо иштерине, 110 млн сом чек ара аймактарына жөнөтүлдү. Бул тууралуу финансы министринин биринчи орун басары Руслан Сүйналиев билдирди, деп маалымдайт ведомствонун басма сөз кызматы.
Анын айтымында, облустун буга чейин быйылкы жылга бекитилген бюджети 4 млрд 197 млн сомду түзгөн. Андан тышкары, сентябрь айында өнүктүрүү программасы боюнча токтом чыгып, анда Баткен үчүн 500 млн сом каралган.
Сүйналиев ошондой эле минкаб буйругунун негизинде капиталдык салымдардын көлөмү 3 млрд сомго көбөйтүлгөнүн белгиледи.
«Бүгүнкү күнгө карата Финансы министрлиги 1 млрд сом которду. Бул акчаны пайдалануунун жыйынтыгында жергиликтүү бийлик бизге кайрылса болот, андан кийин кошумча каражат берилет. Бүгүнкү күндө Финансы министрлиги Баткен облусун жана жабыркаган аймактарды каржылоого даяр», – деди министрдин орун басары.
Сүйналиев жабыр тарткан аймактар үчүн ыктыярчылардын жардамын чогулткан атайын эсеп ачылганын, ага 327 млн сом түшкөнүн эске салды. Анын ичинен 84 млн сом которулган. Бөлүнгөн акчаны Баткен облусундагы өкүлчүлүк тескейт.
